Azərbaycan dili

Azərbaycan dili türk dillərinin oğuz qoluna daxildir; türk, türkmən və qaqauz dilləri ilə çox yaxındır. Azərbaycan Respublikasının dövlət dilidir, İranın şimal-qərbində — Cənubi Azərbaycanda, həmçinin Gürcüstan, Rusiya, Türkiyə və digər ölkələrdə on milyonlarla insanın ana dilidir.

Dilin yazılı ədəbi tarixi XIII–XIV əsrlərə gedib çıxır: Həsənoğlu, Nəsimi, Füzuli, Xətai bu dildə yazıblar. Əlifbası bir neçə dəfə dəyişib: əsrlər boyu ərəb əlifbası, 1929–1939-cu illərdə latın, 1939–1991-ci illərdə kiril, 1991-ci ildən yenidən latın əlifbası.

2001-ci il avqustun 1-dən rəsmi yazışma tamamilə latın qrafikasına keçdi; həmin gün Azərbaycan Əlifbası və Azərbaycan Dili Günü kimi qeyd olunur.