Azərbaycan Xalq Cümhuriyyəti (1918–1920)

28 may 1918-ci ildə Tiflisdə Azərbaycan Milli Şurası İstiqlal Bəyannaməsini qəbul etdi. Hökumət əvvəlcə Gəncədə yerləşdi; 15 sentyabr 1918-də Qafqaz İslam Ordusunun köməyi ilə Bakı azad edildi və paytaxt oldu.

Cümhuriyyət qısa müddətdə parlament (7 dekabr 1918), ordu, bayraq, himn, pul vahidi yaratdı. Qadınlara seçki hüququ verildi — müsəlman dünyasında ilk dəfə. 1 sentyabr 1919-da Bakı Dövlət Universiteti açıldı, yüzə yaxın gənc xaricə təhsil almağa göndərildi.

1920-ci il aprelin 27–28-də Qırmızı Ordu Bakıya daxil oldu və Cümhuriyyət süqut etdi. Onun bayrağı və müstəqillik ideyası 1991-ci ildə yenidən dirçəldi; 28 May Müstəqillik Günü kimi qeyd olunur.