Zəhirəddin Məhəmməd Babur

Babur 14 fevral 1483-cü ildə Fərqanə vadisindəki Andijanda doğulub. Ata tərəfdən Teymurun, ana tərəfdən Çingiz xanın nəslindəndir. 12 yaşında Fərqanə taxtına çıxıb.

Səmərqəndi bir neçə dəfə alıb itirdi. Şeybani xan onu Maveraünnəhrdən çıxardıqdan sonra 1504-cü ildə Kabili tutdu. 1526-cı ildə Panipat döyüşündə Dehli sultanını məğlub edərək Hindistanda Böyük Moğol imperiyasının əsasını qoydu.

Babur həm də incə şair idi. Çağatay türkcəsində yazdığı "Baburnamə" xatirələri dünya ədəbiyyatının ən səmimi avtobioqrafiyalarından sayılır. Andijanda onun adına park-muzey var.