Balaban

Balaban adətən ərik və ya gavalı ağacından hazırlanan silindrik borudur. Üz tərəfində səkkiz, arxasında bir dəlik var; ağzına yastı qamış dil taxılır. Səsi yumşaq və həzindir.

Balaban həm muğam, həm də aşıq ansambllarında çalınır: xüsusilə Şirvan aşıqları sazı balabanla müşayiət edirlər. Toylarda və el şənliklərində də tez-tez səslənir.

"Balaban/mey hazırlanması və ifaçılıq sənəti" 2023-cü ildə Azərbaycan və Türkiyənin birgə təqdimatı ilə UNESCO-nun qeyri-maddi mədəni irs siyahısına daxil edilib. Türkiyədə bu alət mey adlanır.