Füzulinin "Leyli və Məcnun"u

Leyli və Məcnunun faciəvi sevgi hekayəsi ərəb rəvayətlərindən gəlir və Şərqdə dəfələrlə nəzmə çəkilib. Füzuli bu mövzunu 1536-cı ildə Azərbaycan dilində yazdığı poemada yeni zirvəyə qaldırdı.

Füzulinin Məcnunu ilahi eşqə yüksələn bir aşiqdir: dünyadan əl çəkir, səhralarda dolaşır, sevgisini mənəvi kamilliyə çevirir. Poemadakı qəzəllər bu gün də muğamlarda oxunur.

Poema türk dünyası ədəbiyyatının şah əsərlərindəndir. Üzeyir Hacıbəylinin 1908-ci ildə yazdığı "Leyli və Məcnun" operası bu poema əsasında yaranıb.