İmadəddin Nəsimi

İmadəddin Nəsimi XIV əsrin ikinci yarısında Şamaxıda doğulub. Azərbaycan, fars və ərəb dillərində şeirlər yazıb; Azərbaycan dilində olan qəzəlləri bu dilin poeziyasının erkən zirvələrindəndir.

Nəsimi hürufilik təriqətinin tərəfdarı idi: insanı ilahi gözəlliyin güzgüsü sayır, "Məndə sığar iki cahan, mən bu cahana sığmazam" deyirdi. Bu fikirlərə görə 1417-ci ildə Hələbdə amansızlıqla edam olunub.

Onun anadan olmasının 650 illiyi 2019-cu ildə UNESCO-nun yubileylər təqviminə daxil edilib, Azərbaycanda həmin il "Nəsimi ili" elan olunub.