Məhəmməd Füzuli

Məhəmməd Süleyman oğlu Füzuli İraqda, Kərbəla və Bağdad ətrafında yaşamış Azərbaycan türk şairidir. Azərbaycan, fars və ərəb dillərində divanlar yaradıb.

1536-cı ildə Azərbaycan dilində yazdığı "Leyli və Məcnun" poeması türk dünyası ədəbiyyatının şah əsərlərindəndir. Üzeyir Hacıbəylinin 1908-ci il operasının librettosu məhz bu poema əsasında yazılıb.

Füzulinin qəzəlləri bu gün də muğam ifaçılarının ən çox oxuduğu sözlərdir. "Şikayətnamə" adlı nəsr məktubu isə dövrünün haqsızlıqlarını yumorla tənqid edir.