Nedao döyüşü (454)

453-cü ildə Attila gözlənilmədən öldü. Onun oğulları Ellak, Dengizix, İrnik və başqaları dövləti öz aralarında bölmək istədilər. Tarixçi İordan yazır ki, onlar tabe xalqları da qul kimi bölüşdürməyə başladılar və bu, həmin xalqların üsyanına səbəb oldu.

Üsyana gepid kralı Ardarix başçılıq etdi, ona ostqotların bir hissəsi, ruqilər, svevlər və herullar qoşuldu. 454-cü ildə Pannoniyada, Nedao çayı yaxınlığında böyük döyüş oldu. İordana görə, döyüşdə Hunlar və onların müttəfiqlərindən təxminən otuz min adam həlak oldu, Attilanın sevimli oğlu Ellak da onların arasında idi.

Nedaodan sonra Hunlar Pannoniyanı itirib Qara dəniz çöllərinə çəkildilər. Attilanın kiçik oğlu İrnik Dunayın aşağısında qaldı, Dengizix isə 469-cu ildə Bizansla döyüşdə öldü. Macar orta əsr salnamələrində bu döyüş Attilanın oğulları Çaba ilə Aladar arasındakı müharibə kimi rəvayət olunur.