Onqal döyüşü (680)

Kubrat xanın oğlu Asparux bulqarların bir hissəsini qərbə apararaq Dunay deltasında, Onqal adlanan bataqlıqlı ərazidə məskunlaşdı. Buradan Bizans torpaqlarına yürüşlər edirdi. 680-ci ildə ərəblərlə barışıq bağlayan Bizans imperatoru IV Konstantin böyük quru ordusu və donanma ilə bulqarlara qarşı yürüşə çıxdı.

Bulqarlar əvvəl Onqalın bataqlıqlar arasındakı istehkamlarına çəkildilər. Patriarx Nikeforun salnaməsinə görə, imperator ayağındakı ağrıya görə müalicə üçün Mesembriyaya getdi. Ordu arasında imperatorun qaçdığı barədə şayiə yayıldı və Bizans əsgərləri çaşqınlıq içində geri çəkilməyə başladılar.

Asparux bu anı əldən vermədi, istehkamlardan çıxıb geri çəkilən Bizans ordusunu təqib etdi və ağır məğlubiyyətə uğratdı. Bulqarlar Dunayı keçdilər. 681-ci ildə Bizans Dunayın cənubunda Bulqar dövlətini tanıyan və ona hər il xərac ödəməyi öhdəsinə götürən sülh bağladı.