Otrar

Otrar Sırdərya ilə Arıs çayının qovuşduğu yerdə, Türkistan şəhərindən təxminən 50 km cənubda yerləşirdi. Orta əsrlərdə İpək yolunun mühüm ticarət və elm mərkəzi idi; böyük mütəfəkkir Əbu Nəsr Farabinin burada doğulduğu qəbul edilir.

1218-ci ildə Otrar hakimi Qayır xan Çingiz xanın göndərdiyi tacir karvanını qırdırdı. Bu hadisə 1219-cu ildə monqolların Xarəzmşahlar dövlətinə hücumuna səbəb oldu; şəhər uzun mühasirədən sonra dağıdıldı.

Sonralar Otrar yenidən dirçəldi; 1405-ci ildə Əmir Teymur Çinə yürüş zamanı burada vəfat etdi. Bu gün xarabalıqlar açıq səma altında muzey-qoruqdur; yaxınlıqda Arıstan Bab türbəsi yerləşir.