Ötükən

Ötükən yış, yəni Ötükən meşəli dağları, Monqolustanın Xanqay dağlarında, Orxon və Selenqa çaylarının yuxarı axarında yerləşirdi. Göytürk xaqanları burada otururdu, Ötükəni idarə edən xaqan bütün türk ellərinin hökmdarı sayılırdı. Yerin dəqiq sərhədləri bilinmir, xəritədəki nöqtə təxminidir.

Kültigin və Bilgə xaqan abidələrində Bilgə xaqan xalqına müraciət edir: "Ötükən yışından yaxşısı yoxdur, el tutacaq yer Ötükən yışıdır". O, xalqı Çinin ipəyinə və şirin sözlərinə aldanıb uzaqlara köçməkdən çəkindirir. Uyğurlar da 744-cü ildən sonra paytaxtlarını məhz bu torpaqda, Ordubalıqda saldılar.