Papa Leonun Attila ilə görüşü (452)

452-ci ildə Attila İtaliyaya yürüş etdi, Akvileya şəhərini aldı, Milan və Paviyaya girdi. Qərbi Roma imperatoru III Valentinian Romanı qorumaq üçün kifayət qədər ordu toplaya bilmədi və Attilaya elçilik göndərdi.

Elçiliyə Roma papası I Leo başçılıq edirdi, onunla senatorlar Gennadi Avien və Triqetsi də var idi. Görüş Mantuya yaxınlığında, Mincio çayının sahilində oldu. Çağdaş xronist Akvitaniyalı Prosper yazır ki, Attila elçiləri hörmətlə qəbul etdi, sülh vəd edib Dunayın o tayına çəkildi.

Attilanın geri dönməsinin səbəbləri barədə tarixçilər müxtəlif fikirdədir: İtaliyada aclıq, Hun ordusunda yayılan xəstəlik, Şərqi Roma qoşunlarının Hun torpaqlarına hücumu. Sonrakı əsrlərdə kilsə rəvayətləri bu görüşü möcüzə kimi təsvir etdi. Attila bir il sonra, 453-cü ildə vəfat etdi.