Prut müqaviləsi (1711)

1709-cu ildə Poltavada məğlub olan İsveç kralı XII Karl Osmanlıya sığındı. Rusiyanın tələblərindən narazı qalan Osmanlı 1710-cu ilin noyabrında Rusiyaya müharibə elan etdi. Çar I Pyotr 1711-ci ilin yazında Moldovaya yürüş etdi, Balkan xristianlarının ona qoşulacağını gözləyirdi.

Sədrəzəm Baltacı Mehmed Paşanın ordusu Krım xanı II Dövlət Gərayın süvariləri ilə birlikdə Prut çayı sahilində, Stanileşti yaxınlığında rus ordusunu mühasirəyə aldı. Ərzaqsız qalan Pyotr sülh istədi. 23 iyul 1711-ci ildə imzalanan müqavilə ilə Rusiya Azov qalasını Osmanlıya qaytardı, Taqanroq və başqa qalaları sökməyə, Polşanın işlərinə qarışmamağa və XII Karlın İsveçə sərbəst qayıtmasına imkan verməyə söz verdi. Rus tərəfindən danışıqları vitse-kansler Pyotr Şafirov apardı.

Prut müqaviləsi Osmanlı üçün siyasi qələbə sayılır. Bəzi çağdaşlar Baltacı Mehmed Paşanı çarı əsir almaq imkanını əldən verməkdə qınadı və o, az sonra vəzifədən alındı. Müqavilənin şərtləri 1713-cü il Ədirnə müqaviləsi ilə təsdiqləndi.