Qazax dili

Qazax dili türk dillərinin qıpçaq qoluna aiddir; ona ən yaxın dillər noqay və qaraqalpaq dilləridir. Qazaxıstanın dövlət dilidir, Çində, Monqolustanda, Özbəkistanda və Rusiyada yaşayan qazaxlar da bu dildə danışır.

Əsrlər boyu ərəb qrafikasından istifadə olunub; XX əsrin əvvəlində dilçi Əhməd Baytursınulı ərəb əlifbasını qazax səslərinə uyğunlaşdırıb ("Töte jazu"). 1929-cu ildə latın, 1940-cı ildə kiril əlifbasına keçilib.

2017-ci ildə Qazaxıstan yenidən latın qrafikasına keçid haqqında qərar qəbul edib; yeni əlifba 2021-ci ildə təkmilləşdirilib və keçid mərhələlərlə aparılır. Zəngin şifahi ədəbiyyatı — dastanlar, aytıslar, atalar sözləri — dilin qüdrətini qoruyub saxlayıb.