Qırğız dili

Qırğız dili Qırğızıstanın dövlət dilidir. Çinin Kızılsu Qırğız Muxtar Vilayətində, Tacikistanın Dağlıq Bədəxşanında, Əfqanıstan və Türkiyədəki qırğızlar arasında da danışılır. Qazax və altay dilləri ilə qarşılıqlı anlaşma çox yüksəkdir.

Qırğızlar qədimdə göytürk (runik) yazısından istifadə ediblər. Sonra ərəb əlifbası işlənib. 1928–1940-cı illərdə latın, 1940-cı ildən isə kiril əlifbası tətbiq olunub. Kiril əlifbası bu gün də rəsmi əlifbadır.

23 sentyabr 1989-cu ildə "Dövlət dili haqqında" qanun qəbul edilib. O vaxtdan bu gün Qırğızıstanda Dövlət dili günü kimi qeyd olunur. "Manas" dastanı qırğız dilinin ən böyük xəzinəsi sayılır.