Tar

Tar uzun qollu, mizrabla çalınan simli alətdir. Səkkiz rəqəminə bənzəyən gövdəsi adətən tut ağacından oyulur, üzərinə öküz ürəyinin nazik pərdəsi çəkilir. Bu pərdə tarın səsinə xüsusi parlaqlıq verir.

XIX əsrdə Şuşalı tarzən Mirzə Sadıq Əsəd oğlu — Sadıqcan alətin quruluşunu təkmilləşdirib: simlərin sayını artırıb və tarı dizin üstündən sinəyə qaldıraraq çalmağa başlayıb. Bu gün "Azərbaycan tarı" məhz bu formadadır.

Tar muğam üçlüyünün əsas alətidir; Üzeyir Hacıbəylinin "Leyli və Məcnun" operasından bəri simfonik orkestrlə də səslənir. "Tarın hazırlanması və ifaçılıq sənəti" 2012-ci ildə UNESCO-nun Bəşəriyyətin qeyri-maddi mədəni irsi siyahısına daxil edilib.