Loyanın alınması (311)

304-cü ildə Hun şanyularının nəslindən Liu Yuan Şimali Çində Han dövlətini qurmuşdu. Qərbi Szin sülaləsi isə "Səkkiz şahzadə müharibəsi"ndən sonra zəifləmiş, ölkədə aclıq və üsyanlar baş alıb getmişdi. Hunlar 308-ci ildən bəri bir neçə dəfə Loyana hücum etsələr də, şəhəri ala bilməmişdilər.

Liu Yuanın oğlu Liu Konq imperator olandan sonra Liu Yao, Van Mi və Şi Le kimi sərkərdələr Szin ordularını bir-bir məğlub etdilər. 311-ci ilin iyulunda Loyan alındı, imperator Huay-di əsir düşdü. Mənbələrə görə şəhər talan edildi, saraylar yandırıldı və on minlərlə adam həlak oldu.

Bu hadisə Çin tarixində ən ağır fəlakətlərdən biri kimi yadda qaldı: ilk dəfə köçəri xalqlardan çıxan bir dövlət Çinin paytaxtını aldı. 316-cı ildə Çanğan da alındı və Szin sülaləsi cənuba, Yanszı çayından o tərəfə çəkildi. Şimali Çində "On altı dövlət" dövrü başladı.