Xanva döyüşü (1527)

Panipat qələbəsindən sonra Babür Dehli və Aqranı tutmuşdu, amma Şimali Hindistanın ən güclü qüvvəsi hələ qarşıda idi. Mevar hökmdarı Rana Sanqa Racput knyazlarını və Lodilərin qalıqlarını öz ətrafında birləşdirib böyük ordu topladı. Babürün əsgərləri yorğun idi, çoxu Kabilə qayıtmaq istəyirdi.

Babür "Babürnamə"də yazır ki, döyüşdən əvvəl o, şərabdan imtina etdi, qızıl və gümüş qədəhləri sındırıb kasıblara payladı və ordusuna ürək verən nitq söylədi. 16 mart 1527-ci ildə Aqra yaxınlığındakı Xanvada döyüş başladı. Babür Panipatdakı kimi bir-birinə bağlanmış arabalardan sədd qurdu, topları və tüfəngçiləri mərkəzə yerləşdirdi, cinahlarda süvarilər "tulğama" ilə düşməni dövrəyə aldı.

Gün boyu davam edən ağır döyüşdən sonra Racput ordusu məğlub oldu, Rana Sanqa yaralı halda meydandan çıxarıldı və bir il sonra öldü. Xanva Babürlərin Şimali Hindistandakı hakimiyyətini möhkəmləndirdi. Bu döyüş Hindistanda odlu silahların həlledici rol oynadığı ilk böyük döyüşlərdən biri sayılır.