Yanardağ

Yanardağ Bakı yaxınlığında, Məmmədli kəndi ərazisində yerləşir. Təpənin ətəyində, təxminən on metr uzunluğunda bir xətt boyunca yerin altından çıxan təbii qaz fasiləsiz yanır — yağışda da, qarda da.

Abşeronda belə təbii alovlar qədimdən məlumdur və Azərbaycanın "Odlar yurdu" adlanmasının səbəblərindən biri sayılır. Səyyahlar əsrlər boyu bu alovlar haqqında yazıblar.

2007-ci ildə ərazi Yanardağ Dövlət Tarix-Mədəniyyət və Təbiət Qoruğu elan edilib. Qoruqda ziyarətçi mərkəzi və muzey fəaliyyət göstərir; alov xüsusilə axşam qaranlığında təsirli görünür.