Əliyev Şuşada: “Dünyada bizim qədər bir-birinə bağlı olan xalqlar da yoxdur, dövlətlər də yoxdur”

Prezident İlham Əliyev noyabrın 8-də Şuşada Türkiyə Prezidenti ilə birgə mətbuata bəyanatla çıxış etdi. O, Ərdoğanın Zəfər Günündə Qarabağda olmasının bütün xalqı sevindirdiyini dedi və 44 gün ərzində Türkiyənin Azərbaycanın yanında olduğunu xatırlatdı: “Azərbaycan tək deyil, Türkiyə onun yanındadır” sözlərinin heç vaxt unudulmayacağını bildirdi.

Əliyev 2021-ci ildə Şuşada imzalanan Şuşa Bəyannaməsinin münasibətləri rəsmən müttəfiqlik səviyyəsinə qaldırdığını, Türkiyənin bu gün güclü iqtisadiyyatı və siyasi çəkisi ilə dünya miqyasında söz sahibi olduğunu dedi. Ermənistanla normallaşma prosesinin getdiyini, sülh sazişinin bir ildən çoxdur paraflandığını, amma hələ imzalanmadığını da qeyd etdi.

Prezident bildirdi ki, iki xalqın birliyini sarsıtmaq istəyənlər arzularına çatmayacaq: “Heç kimə imkan vermərik ki, bizim aramıza girsin.” Bəyanatının sonunda o, Ərdoğanın sıx qrafikinə baxmayaraq gəlməsinə təşəkkür etdi.