Bakıda qazax xalqının ənənəvi mədəniyyətinə həsr olunmuş sərgi açıldı: 69 etnoqrafik əşya nümayiş olunur

Noyabrın 13-də Azərbaycan Milli Tarix Muzeyində “Qazax xalqının ənənəvi mədəniyyəti” sərgisi açıldı. Sərgi dekabrın 12-dək davam edəcək. Layihəni Qazaxıstanın Mədəniyyət və İnformasiya Nazirliyi və Türk Mədəniyyəti və İrsi Fondu dəstəkləyib.

Qazaxıstan Milli Mərkəzi Muzeyinin kolleksiyasından gətirilmiş 69 orijinal əşya var: taxta və dəri məişət əşyaları, at ləvazimatı, zərgərlik, keçə və parça məmulatı, kişi və qadın milli geyimləri. Ekspozisiya atçılıq mədəniyyəti, qonaqpərvərlik və ənənəvi məskən bölmələrinə ayrılıb.

Açılışda muzeyin direktoru Nailə Vəlixanlı, Azərbaycanın mədəniyyət nazirinin müavini Səadət Yusifova, Qazaxıstan Milli Mərkəzi Muzeyinin direktor müavini Əsgər Əhmanov, Qazaxıstanın Bakıdakı səfirliyinin müşaviri Yedil Mırzaxanov və Türk Mədəniyyəti və İrsi Fondunun nümayəndəsi Leyla Həsənova iştirak edib. Bakı sakini Günel Həsənova sərgini gəzərkən deyib ki, musiqi alətlərinin çoxu Azərbaycandakılara bənzəyir, çünki xalqlarımızın ortaq türk kökləri var.