Astanadakı güləş üzrə dünya çempionatında ilk finallar: Əzizli və Süleymanov qızıl, türk dövlətlərindən 7 medal

Qazaxıstanın paytaxtı Astanada, “Barıs Arena”da güləş üzrə dünya çempionatı davam edir. Yarış oktyabrın 24-dən noyabrın 1-dək keçirilir və yunan-Roma güləşi, sərbəst güləş və qadın güləşi üzrə dünyanın ən güclü idmançılarını bir araya gətirib. Oktyabrın 25-də yunan-Roma güləşinin ilk dörd çəki dərəcəsində medallar sahiblərini tapıb.

Türk dövlətlərinin idmançıları ilk final axşamını 7 medalla başa vurub. Azərbaycan yığması iki qızıl qazanıb: 55 kq-da Eldəniz Əzizli finalda İran təmsilçisi Payam Əhmədini, 77 kq-da isə Sənan Süleymanov Moldovadan Aleksandrin Qutsunu məğlub edərək dünya çempionu olub. Azərbaycan Güləş Federasiyasının məlumatına görə, Əzizli üçün bu, beşinci dünya çempionluğudur.

Türkiyədən Yüksel Sarıçiçək 82 kq-da gümüş medal qazanıb. Ev sahibi Qazaxıstan iki bürünc medal toplayıb: İskhar Kurbayev (55 kq) və Aydos Sultanqali (60 kq). Özbəkistandan Əlişer Qaniyev (60 kq) və Qırğızıstandan Akjol Mahmudov (82 kq) da bürünc medala layiq görülüb.

Çempionatda yunan-Roma güləşinin qalan çəki dərəcələrinin finalları oktyabrın 26 və 27-də, ardınca qadın güləşi və sərbəst güləş yarışları keçiriləcək.