İlham Əliyev Hindistanın xarici işlər nazirini qəbul etdi: Modinin tapşırığı ilə gələn qonaqla əlaqələrin genişlənməsi müzakirə olundu

Azərbaycan Prezidenti İlham Əliyev oktyabrın 23-də Hindistanın xarici işlər naziri Subrahmanyam Cayşankarı qəbul edib. Nazir ölkəmizə Baş nazir Narendra Modinin tapşırığı ilə səfər edib.

Cayşankar Hindistan Prezidenti Draupadi Murmunun və Baş nazir Modinin salamlarını çatdırıb, İlham Əliyev də öz salamlarını onlara yetirməyi xahiş edib. Dövlət başçısı Bişkekdə Modi ilə keçirdiyi görüşü xatırladıb və səfəri ikitərəfli münasibətlərin mövcud vəziyyətini və perspektivlərini müzakirə etmək baxımından yüksək qiymətləndirib.

Görüşdə Azərbaycan–Hindistan əlaqələrinin siyasi, iqtisadi-ticari, yüksək texnologiyalar, mədəniyyət və humanitar sahələrdəki əməkdaşlığı nəzərdən keçirilib. Tərəflər “Qlobal Cənub” ölkələri kimi inkişaf etməkdə olan dövlətləri maraqlandıran beynəlxalq məsələlərdə ortaq mövqelərini və beynəlxalq təşkilatlar çərçivəsindəki əməkdaşlığı vurğulayıblar.

Siyasi təmasların artırılması, müxtəlif səviyyələrdə qarşılıqlı səfərlərin və iqtisadi-biznes heyətlərinin mübadiləsinin vacibliyi də qeyd olunub.