Korkut Ata Türk Dünyası Film Festivalı bağlandı: ən yaxşı film Türkiyədən «Kanto», sənədli birinci yer Saxadan

İstanbulda 3-7 noyabr tarixlərində keçirilən altıncı Korkut Ata Türk Dünyası Film Festivalının mükafatları təqdim olunub. TÜRKSOY-un Türkiyə Mədəniyyət və Turizm Nazirliyi ilə birgə təşkil etdiyi festivalda 56 film nümayiş olunub, 30 əsər bədii, sənədli və qısametrajlı kateqoriyalarda yarışıb. Bağlanış mərasimi Atatürk Mədəniyyət Mərkəzində keçirilib; TÜRKSOY Baş katibi Sultan Raev, nazir Mehmet Nuri Ersoy və Özbəkistan nümayəndələri iştirak edib.

Bədii filmlərdə ən yaxşı film Ensar Altayın (Türkiyə) «Kanto»su seçilib. Ən yaxşı rejissor Zaur Qasımlı («Tağıyev: Məktəb», Azərbaycan), ən yaxşı ssenari müəllifi Taalaybek Kulmendeyev («Yusuf», Qırğızıstan), ən yaxşı aktrisa Amina Salmanova (Başqırdıstan, «Farzana Qərbə gedir»), ən yaxşı aktyor Matyokub Matçonov (Özbəkistan, «Farz») olub. TÜRKSOY-un xüsusi mükafatı Vefa İşanquliyevin (Türkmənistan) «Gürgənc gözəli Törəbəy» filminə, münsiflər heyətinin xüsusi mükafatı Torebek Beysebayevin (Qazaxıstan) «38: Son nöqtə» filminə verilib.

Sənədli filmlərdə birinci yeri Saxa Respublikasından «Isıyah: Yay gündönümü» tutub, ikinci yer Muminjan İsmatillanın (Özbəkistan) «Həyat susuzluğu», üçüncü yer Tunç Boranın (Türkiyə) «Sönməyən ateş» filminə çatıb. Münsiflərin xüsusi mükafatı Atakan Kərküklünün Azərbaycan və Türkiyə birgə istehsalı olan «Azıx mağarası: Azərbaycanın beşiyi» sənədli filminə verilib. Qısametrajlılarda Mert Erezin «Rehber» (Türkiyə) birinci, Temirlan Orisbayevin «Nənə» (Qazaxıstan) ikinci, Suhrob Qodirov və Dilşod Usmonovun «Günəş uşaq Yusuf» (Özbəkistan) üçüncü olub.

Festival çərçivəsində Türk Dünyası Kino Zirvəsi, Korkut Ata Kino Simpoziumu və süni intellekt panelı da keçirilib, ilk Türkiyə-Qırğızıstan layihə təqdimatında dörd layihənin maliyyələşdiriləcəyi bildirilib. Bağlanışda Türk Dünyası Turizm Paytaxtı rəmzi Ankaradan (2026) Daşkəndə (2027) təhvil verilib.