Kubanıçbek Omuraliyev Türk İnvestisiya Fondunun yeni prezidenti təyin edildi

Türk Dövlətləri Təşkilatının keçmiş Baş katibi, qırğızıstanlı diplomat Kubanıçbek Omuraliyev Türk İnvestisiya Fondunun (TİF) prezidenti təyin olunub. Qərarı fondun İdarəçilər Şurası yekdilliklə qəbul edib, məlumatı TDT-nin rəsmi kanalı paylaşıb.

Omuraliyev 2022-ci ilin noyabrında Səmərqənd zirvəsində TDT Baş katibi seçilmişdi, bu ayın əvvəlində isə vəzifəni Mirvahid Əzimova təhvil verib. Fondun ilk prezidenti Bağdad Amreyev 2022-ci il noyabrın 11-də təyin edilmişdi və dörd illik səlahiyyət müddəti başa çatır; nizamnaməyə görə vəzifə təkrar təyinatsız, rotasiya qaydası ilə doldurulur.

Oktyabrın 22-də Daşkənddə keçirilən İdarəçilər Şurasının üçüncü iclasında rotasiya proseduru təsdiqlənmişdi və 2026-2030-cu illər üçün prezident namizədini Qırğızıstanın göstərəcəyi bəlli olmuşdu. Fondun nizamnamə kapitalı 600 milyon dollardır: Azərbaycan, Türkiyə, Qazaxıstan, Özbəkistan, Qırğızıstan və Macarıstan hər biri 100 milyon dollar ayırıb.