Özbəkistan və Azərbaycan Alat azad zonasında 117,7 milyon dollarlıq qablaşdırma zavodu quracaq

Azərbaycan-Özbəkistan Investisiya Şirkəti (AUIC) və Azərbaycan Biznesin İnkişafı Fondu Hindistanın UFlex Group şirkəti ilə birlikdə Alat Azad İqtisadi Zonasında qablaşdırma filmi istehsal edən zavod quracaq. Sənədlərin mübadiləsi Prezident İlham Əliyevin iştirakı ilə Bakıda keçirilən 2-ci Azərbaycan Beynəlxalq İnvestisiya Forumu çərçivəsində baş tutub. Xəbəri noyabrın 11-də Özbəkistanın milli informasiya agentliyi UzA yayıb.

Layihənin ümumi dəyəri 117,7 milyon dollardır. Zavod Alat zonasında 4,7 hektar sahədə yerləşəcək və ildə 60 min ton qablaşdırma məhsulu istehsal etməyə hesablanıb. Layihə hazırda tikintiyə hazırlıq mərhələsindədir, istehsalın əsas hissəsi ixrac üçün nəzərdə tutulur.

UzA-ya görə, forumda ümumilikdə 10,8 milyard dollarlıq 23 saziş imzalanıb. Onlar süni intellekt, bərpa olunan enerji, sənaye və maliyyə sahələrini əhatə edir.