Özbəkistanda Əmir Teymur nəslinin tarixi haqqında yeni kitab çıxdı: 131 nadir miniatür Hindistan kitabxanasından götürülüb

Özbəkistanda tarixçilər Əbdülməcid Mədrəimov və Əskəriy Mədrəimovun “Teymurilər tarixi: Əkbərşahın əcdadları” kitabı nəşr olunub. Kitabı Özbəkistan Elmlər Akademiyası, Teymurilər Tarixi Dövlət Muzeyi və Daşkənd Dövlət Şərqşünaslıq Universiteti birgə hazırlayıb. Xəbəri UzA noyabrın 13-də verib.

Əsər Əmir Teymurun və Teymuri sülaləsinin digər nümayəndələrinin həyatına, tarixi və mədəni irsinə, həmçinin Baburilər dövrünün əsas hadisələrinə həsr olunub. Əsas mənbə Hindistanın Patna şəhərindəki Xuda Bəxş Şərq Kitabxanasında saxlanan 131 nadir miniatür rəsmdir.

İllüstrasiyalar Əmir Teymur dövründən Baburilər hakimiyyətinə qədərki dövrü əhatə edir, hökmdarların fəaliyyətini, saray həyatını və mədəni ənənələri göstərir. Kitabda 16-17-ci əsrlərdə Hindistanda, Xorasanda və Şimali Çində baş verən inkişaf, miniatür sənətinin özünəməxsus cəhətləri və vizual mənbələrin tarixi sübut kimi dəyəri təhlil olunur.