Qazax dili süni intellektə öyrədilir: “Qazaq tili” cəmiyyəti Tokayevə 14 milyardlıq mətn bazasını təqdim etdi

Qazaxıstan Prezidenti Kasım-Jomart Tokayev noyabrın 9-da Beynəlxalq “Qazaq tili” Cəmiyyətinin rəhbəri Rauan Kenjehanulını qəbul etdi. Cəmiyyət dövlət dilinin inkişafı üçün üç istiqamətdə işlədiyini bildirdi: qazax dilinin tədris metodikasının yaxşılaşdırılması, dildə rəqəmsal məzmunun artırılması və yeni texnologiyalarda istifadəsinin genişləndirilməsi.

OpenAI ilə birgə işin nəticəsində 14 milyard tokenlik mətn korpusu və 12 min saatlıq səs yazısı toplanıb. Son üç ildə Disney, Pixar və Sony-nin 13 məşhur filmi kinoteatrlarda qazaxca dublyajla nümayiş olunub.

Prezidentə “Qazaq tili” Vəqfinin də fəaliyyəti barədə məlumat verildi: vəqfə daxil olan vəsait 824 milyon tenqəyə çatıb. Tokayev cəmiyyətin işini yüksək qiymətləndirdi, uğurlar arzuladı və dövlət dilinin tədrisində, elmi ədəbiyyatın tərcüməsində süni intellektdən tam istifadə etməyin vacibliyini vurğuladı.