TDT-nin Ankara zirvəsi bitdi: Bəyannamə qəbul edildi, Baş katib Mirvahid Əzimov, sədrlik Türkiyədə

Oktyabrın 30-da Ankarada keçirilən Türk Dövlətləri Təşkilatının 13-cü zirvəsinin yekunu olaraq Ankara Bəyannaməsi qəbul olundu. Zirvədə Ərdoğan, Tokayev, Japarov, Mirziyoyev, Serdar Berdimuhamedov, Azərbaycan xarici işlər naziri Ceyhun Bayramov və TDT Baş katibi Kubanıçbek Ömüraliyev çıxış etdi.

Qırğızıstan prezidentliyinin məlumatına görə, liderlər bəyannamə ilə yanaşı Baş katibin və onun müavinlərinin, həmçinin Türk Akademiyası prezidentinin təyini barədə qərarlar imzaladı. Qazaxıstan Prezidenti Tokayev çıxışında yeni Baş katib kimi Mirvahid Əzimovun adını çəkdi və Kubanıçbek Ömüraliyevə görülən işə görə təşəkkür etdi.

Başqa bir qərarla Sadır Japarov “Türk Dünyasının Ali Ordeni” ilə təltif olundu.

Azərbaycanın bir ildən bəri daşıdığı Şuranın sədrliyi bu zirvədən sonra Türkiyəyə keçir. Tokayev Azərbaycanın təşkilatın nüfuzunun artmasına verdiyi töhfəyə görə minnətdarlıq bildirdi.