Ankarada Türk Dövlətləri Mədəniyyət Parkı açıldı: TDT liderləri Orxon yazıları önündə şam ağacı əkdi

Oktyabrın 29-da, Türk Dövlətləri Təşkilatının 13-cü zirvəsi çərçivəsində Ankarada, Prezident Kompleksinin ərazisində Türk Dövlətləri Mədəniyyət Parkı açıldı. Liderlər Kompleksdən parka yerli istehsal TOGG T10X avtomobilləri ilə gəldilər.

Açılışda Türkiyə Prezidenti Rəcəb Tayyib Ərdoğan, Qazaxıstan Prezidenti Kasım-Jomart Tokayev, Özbəkistan Prezidenti Şavkat Mirziyoyev, Qırğızıstan Prezidenti Sadır Japarov, Türkmənistan Prezidenti Sərdar Berdiməhəmmədov və Quzey Kipr Türk Cümhuriyyətinin Prezidenti Tufan Erhürman iştirak etdilər. Azərbaycanı tədbirdə xarici işlər naziri Ceyhun Bayramov, təşkilatı isə Baş katib Kubanıçbek Ömüraliyev təmsil etdi.

Liderlər parkda birlikdə şam ağacı əkdilər və Orxon yazılarının surətləri önündə xatirə şəkli çəkdirdilər. Parkda Türkiyə, Azərbaycan, Qazaxıstan, Qırğızıstan, Özbəkistan və Türkmənistanın milli pavilyonları yer alır. Qazaxıstan pavilyonunda Böyük Çölün ruhunu əks etdirən qazax yurdu qurulub, qonaqlara quşla ovu təsvir edən “Sak ovçusu” heykəli təqdim edildi. Ərdoğan qonaqları Ayasofya, Anıtkabir, Çanaqqala Şəhidlər Abidəsi, Göbəklitəpə və Səlimiyyə məscidinin miniatürlərinin olduğu hissədə gəzdirdi.

Mərasimdə mehtər marşları səsləndi, “Türk Yıldızları” aviaqrupu uçuş nümayişi keçirdi. Axşam liderlər Malazgirt Şou Mərkəzində türklərin Orta Asiyadan Anadoluya uzanan yolunu anladan “Atların Rəqsi: Diriliş Atəşi” tamaşasına baxdılar. Zirvənin əsas iclası — Dövlət Başçıları Şurası oktyabrın 30-da keçiriləcək.