Türkiyənin “Fergani” şirkəti altıncı peykini orbitə çıxardı: FRG-100D4 peyki 590 km hündürlükdə və süni intellektli kompüterlə təchiz olunub

Türkiyənin “Fergani” kosmik texnologiyalar şirkəti altıncı sınaq peyki FRG-100D4-ü orbitə çıxarıb. Anadolu agentliyinin oktyabrın 21-də yaydığı məlumata görə, peyk SpaceX-in “Bandwagon-5” missiyası çərçivəsində buraxılıb, daşıyıcıdan ayrılandan təxminən 63 dəqiqə sonra Yer səthindən 590 kilometr hündürlükdəki hədəf orbitə çatıb.

Peykin istehsalçısı olan “Baykar”ın bildirdiyinə görə, FRG-100D4 əvvəlki peyklərlə müqayisədə bir sıra texnoloji təkmilləşdirmələrə malikdir və daha mürəkkəb missiyaları dəstəkləmək üçün süni intellektli kompüterlə təchiz olunub.

Peykin tərkibində yerli istehsal komponentlər var: reaksiya çarxı, maqnit fırlanma çubuğu, maqnitometr, ətalət ölçmə qurğusu, GNSS qəbuledicisi, idarə olunan günəş panelləri, batareya bloku, regenerativ modem və fazalı antenna massivi.