TÜRKPA-nın gənc parlamentarilər qrupu Ankarada toplandı: Türkiyə Böyük Millət Məclisi tədbirə ev sahibliyi etdi

Türk Dövlətləri Parlament Assambleyasının (TÜRKPA) Gənc Parlamentarilər Qrupunun görüşü noyabrın 12-də Ankarada keçirilib. Tədbir Türkiyə Böyük Millət Məclisinin himayəsi və Xaricdəki Türklər və Qohum Topluluqlar Başkanlığının (YTB) dəstəyi ilə təşkil olunub.

Açılışda Böyük Millət Məclisinin sədri Numan Kurtulmuş çıxış edib. O, türk dövlətlərindən gələn gənc deputatları Türkiyədə qəbul etməkdən məmnunluğunu bildirib və görüşün TÜRKPA-nın yaradılmasının 18-ci ildönümü ərəfəsinə təsadüf etdiyini xatırladıb. Kurtulmuş Assambleyanın türk dövlətlərinin parlamentləri arasında münasibətləri yeni mərhələyə çıxarmaqda rolunu qeyd edib və Türkiyə parlamentinin onun bütün fəaliyyətinə hərtərəfli dəstək verəcəyini söyləyib.

TÜRKPA Baş katibi səfir Ramil Həsən gənclər qrupu, qadın parlamentarilər qrupu və daimi komissiyalar çərçivəsində keçirilən tədbirlərin ölkələr arasında bağları, deputatlar arasında səmimi münasibətləri və qanunvericilik bazalarının yaxınlaşmasını gücləndirdiyini bildirib. Təşəkkür sözlərində o, təşəbbüsün reallaşmasında Türkiyə parlamentinin deputatı və Gənc Parlamentarilər Qrupunun üzvü Emre Çalışkanın rolunu xüsusi qeyd edib.

YTB sədri Abdulhadi Turus türk dövlətləri arasında münasibətlərin inkişafına xidmət edən layihələrin Türkiyə tərəfindən hərtərəfli dəstəkləndiyini, qurumun TÜRKPA-nın gənclər qrupunun fəaliyyətinə bundan sonra da yardım göstərməyə hazır olduğunu deyib.