BMT-nin Cenevrə ofisində Maverənnəhrin elmi və mənəvi irsinə həsr olunan beynəlxalq konfrans keçirildi

Oktyabrın 23-də BMT-nin Cenevrədəki Millətlər Sarayında “İslam sivilizasiyası: Maverənnəhrin böyük mənəvi və elmi irsi və maarifçilik üfüqləri” adlı beynəlxalq elmi konfrans keçirilib. Tədbirdə diplomatlar, xarici akademiklər, ekspertlər və Özbəkistandan rəsmilər, alimlər iştirak edib.

Konfrans Özbəkistan Prezidenti Şavkat Mirziyoyevin 2025-ci ilin sentyabrında BMT Baş Assambleyasının 80-ci sessiyasında irəli sürdüyü, İmam Buxari, İmam Termizi və İmam Maturidinin irsinin BMT-də təqdim olunması təşəbbüsünün davamı kimi təşkil olunub. Təşkilatçılar arasında Özbəkistanda İslam Sivilizasiyası Mərkəzi, Dini İşlər üzrə Komitə, Elmlər Akademiyası, üç imamın adını daşıyan beynəlxalq tədqiqat mərkəzləri və ölkənin Cenevrədəki Daimi Nümayəndəliyi var.

Əsas məruzəçi Əkmal Saidov bölgənin Avestadan Soqd hüquq sənədlərinə və islam elminə qədər uzanan hüquqi və elmi ənənələrini, mədəni irs, maarifçilik, qanunun aliliyi və insan hüquqları arasındakı əlaqəni vurğulayıb; tolerantlıq barədə 1995-ci il YUNESKO Bəyannaməsini və Mirziyoyevin təklif etdiyi 2018-ci il BMT qətnaməsini xatırladıb.

Müzakirələrdə Quran elmləri, hədis, fiqh, kalam və təsəvvüf, Əl-Xarəzmi, Biruni, İbn Sina və Uluğbəy kimi alimlərin töhfələri nəzərdən keçirilib. Qədim əlyazma surətləri, elmi nəşrlər və miniatürlərdən ibarət sərgi də nümayiş olunub. Konfrans tədqiqat, irsin qorunması, təhsil və sivilizasiyalararası dialoq sahələrində beynəlxalq əməkdaşlığın genişləndirilməsinin müzakirəsi ilə başa çatıb.