Üsküpdə III Beynəlxalq Türk Dünyası Qadın Çalıştayı başlayıb

III Beynəlxalq Türk Dünyası Qadın Çalıştayı oktyabrın 22-də Şimali Makedoniyanın paytaxtı Üsküpdə (Skopye) başlayıb. İki gün davam edəcək tədbirdə yeddi sessiya keçiriləcək. Çalıştayı Umay Ana Türk Dünyası Qadınlar Birliyi (TÜRKKAB) Türkiyənin Mədəniyyət və Turizm Nazirliyi, TÜRKSOY, TİKA, Xaricdəki Türklər və Qohum Cəmiyyətlər Başqanlığı və digər tərəfdaşlarla birgə təşkil edib.

Açılış TÜRKSOY-un «Türk dünyasında qadın» rəsm sərgisi ilə olub. Tədbirdə Türkiyənin Üsküpdəki səfiri Alper Aktaş, TÜRKKAB sədri professor Mualla Uydu Yücel, TÜRKSOY-un baş katibi Sultan Rayevi təmsil edən ekspert Mehbare Şahin, Yunus Əmrə İnstitutunun Üsküp nümayəndəsi Yunus Dilber və digər qonaqlar çıxış edib.

Çıxışlarda qadınların cəmiyyətin inkişafındakı rolu, mədəni irsin qorunması və ortaq dəyərlərin gələcək nəsillərə ötürülməsi vurğulanıb. Çalıştayda müxtəlif ölkələrdən akademiklər, tədqiqatçılar və vətəndaş cəmiyyəti nümayəndələri elmdə, mədəniyyətdə, incəsənətdə, təhsildə və ictimai həyatda qadınların rolunu müzakirə edəcək.