ADEX — Azərbaycan Beynəlxalq Müdafiə Sərgisi

ADEX (Azerbaijan International Defence Exhibition) — Bakı Ekspo Mərkəzində keçirilən beynəlxalq müdafiə sərgisidir. Sərgi Müdafiə Sənayesi Nazirliyinin təşəbbüsü və Müdafiə Nazirliyinin dəstəyi ilə təşkil olunur. Onunla eyni vaxtda daxili təhlükəsizlik, mühafizə və xilasetmə avadanlıqları sərgisi "Securex Caspian" də keçirilir.

Tarixçə

İlk ADEX 2014-cü ildə keçirildi, sonrakılar 2016 və 2018-ci illərdə oldu. 2020-ci ildə sərgi keçirilmədi; 4-cü ADEX 2022-ci ildə, 5-ci 2024-cü ildə təşkil olundu. Hər dəfə iştirakçıların sayı artıb, sərgi Cənubi Qafqaz və Xəzər regionunun əsas müdafiə platformasına çevrilib.

ADEX 2026

6-cı sərgi 30 sentyabr – 2 oktyabr 2026-cı ildə keçirildi. ADEX və Securex Caspian sərgilərinə 30 ölkədən 277 şirkət qatıldı, 14 ölkənin milli pavilyonu quruldu, 39 ölkədən 59 xarici nümayəndə heyəti qeydiyyatdan keçdi. Rekord iştiraka görə Ekspo Mərkəzinin əlavə pavilyonu açıldı, bir pavilyon ilk dəfə milli ekspozisiyaya ayrıldı. Ən geniş təmsil olunan ölkə Türkiyə idi; ABŞ-ın bir neçə şirkəti ilk dəfə qatıldı.

Prezident İlham Əliyev və birinci xanım Mehriban Əliyeva sentyabrın 30-da sərgi ilə tanış oldular. Müdafiə Nazirliyinin stendində Azərbaycan Ordusunun silahlanmasındakı artilleriya sistemləri, aviasiya texnikası və pilotsuz sistemlər nümayiş olundu. Yerli müəssisələrdən 2023-cü ildə yaradılmış "Azərsilah" Müdafiə Sənayesi Holdinqi, "Vektor" şirkətlər qrupu, "AZDEF" və başqaları məhsullarını göstərdi.

Xarici iştirakçılar arasında Türkiyənin Baykar, ASELSAN, Roketsan, Dearsan, İsrailin IAI, Rafael, Elbit Systems, İtaliyanın Leonardo, BƏƏ-nin EDGE Group, Almaniyanın Rheinmetall, Böyük Britaniyanın BAE Systems, Pakistanın aviasiya kompleksi, Özbəkistanın Müdafiə Sənayesi Agentliyi və başqaları var idi. Sərgi günlərində Türkiyə ilə 500 milyon dollardan çox dəyərində müqavilələr imzalandı.