Ayasofya

Ayasofya Bizans imperatoru I Yustinianın əmri ilə 532–537-ci illərdə tikilib. Onun 55 metr yüksəklikdəki günbəzi əsrlər boyu dünyanın ən böyük qapalı məkanlarından birini örtürdü və memarlıq tarixində dönüş nöqtəsi sayılır.

1453-cü ildə İstanbul fəth olunandan sonra Fateh Sultan Mehmet Ayasofyanı məscidə çevirdi; ona minarələr, mehrab və minbər əlavə olundu. Memar Sinan XVI əsrdə binanın divarlarını dayaqlarla möhkəmləndirdi. Osmanlı memarları sonrakı böyük məscidlərdə Ayasofyanın günbəz həllini inkişaf etdirdilər.

1934-cü ildə bina muzeyə çevrildi, 2020-ci ildə yenidən məscid kimi ibadətə açıldı. Ayasofya "İstanbulun tarixi əraziləri" adı ilə UNESCO-nun Dünya İrsi siyahısındadır.