Əmir Teymurun Dehlini alması (1398)

XIV əsrin sonunda Dehli sultanlığı daxili çəkişmələrlə zəifləmişdi: eyni vaxtda iki sultan hakimiyyət iddia edirdi. 1398-ci ildə Əmir Teymur böyük ordu ilə Hind çayını keçdi, Multanı aldı və Dehliyə yönəldi. Hindistan yürüşündə o, torpaq tutmaqdan çox, ölkənin sərvətinə göz dikmişdi.

17 dekabr 1398-ci ildə Dehli yaxınlığında Teymur Sultan Nasirəddin Mahmud şah Tuğluq və onun vəziri Mallu İqbalın ordusu ilə qarşılaşdı. Sultan ordusunda döyüş filləri var idi. Teymur ordusunun qarşısında xəndəklər qazdırdı və tikanlı dəmir maneələr qoydurdu, rəvayətə görə üstünə yanan saman yüklənmiş dəvələri fillərin üstünə buraxdı. Fillər çaşıb geri döndü və Hindistan ordusu məğlub oldu.

Teymur Dehliyə girdi və şəhər bir neçə gün ağır talana və qırğına məruz qaldı. Mənbələrə görə, döyüşdən əvvəl də çoxlu əsir öldürülmüşdü. Teymur Dehlidən çoxlu sərvət, fillər və ustalar apardı: Səmərqənddəki Bibi xanım məscidinin tikintisində bu ustalar da çalışdı. Dehli sultanlığı bu zərbədən uzun müddət özünə gələ bilmədi.