Gəncə

Gəncə Azərbaycanın qərbində, Kiçik Qafqazın ətəyində yerləşən qədim şəhərdir. Orta əsrlərdə Şərqin böyük elm və sənət mərkəzlərindən biri olub. Böyük şair Nizami Gəncəvi və şairə Məhsəti Gəncəvi burada yaşayıb-yaradıb.

1918-ci ildə Azərbaycan Xalq Cümhuriyyətinin hökuməti Bakı azad edilənə qədər Gəncədə yerləşirdi. Şəhərin son xanı Cavad xan 1804-cü ildə Rusiya qoşunlarına qarşı qəhrəmancasına müdafiə olunarkən həlak olub.

Nizami məqbərəsi, Şah Abbas məscidi (Cümə məscidi), Cavad xanın türbəsi və Xan bağı şəhərin əsas yerləridir. Gəncə yaxınlığındakı Göygöl də turistlərin sevimli məkanıdır.