Göygöl

Göygöl Gəncədən cənubda, Kiçik Qafqazda, dəniz səviyyəsindən təxminən 1500 metr hündürlükdə yerləşir. 1139-cu ildə güclü zəlzələ zamanı Kəpəz dağının bir hissəsi uçaraq Ağsu çayının yolunu bağlamış, beləcə bir neçə göl yaranmışdır. Göygöl onların ən böyüyü və ən gözəlidir.

Gölün suyu o qədər duru və mavidir ki, adını da buradan alıb. Ətrafı sıx meşələrlə örtülüdür. 2008-ci ildə Göygöl Milli Parkı yaradılıb.

Göygöl Azərbaycan poeziyasında və mahnılarında tez-tez tərənnüm olunur; Gəncədən gələn ziyarətçilərin ən çox getdiyi yerlərdəndir.