I Şah Abbas

Abbas Şah Məhəmməd Xudabəndənin oğlu idi, on yeddi yaşında taxta çıxdı. Qızılbaş əmirlərinin gücünü məhdudlaşdırmaq üçün Qafqaz əsilli "qulam" qoşunları yaratdı, ordunu odlu silahla təchiz etdi. 1590-cı ildə Osmanlı ilə ağır şərtlərlə sülh bağladı, sonra güclənib 1603-cü ildən itirilmiş torpaqları, o cümlədən Təbriz, Gəncə və İrəvanı geri aldı.

1598-ci ildə paytaxtı Qəzvindən İsfahana köçürdü və orada Nəqşi-Cahan meydanını, Şah məscidini, Şeyx Lütfullah məscidini, Ali Qapı sarayını tikdirdi. Avropa dövlətləri ilə ticarət əlaqələri qurdu, ipək ticarətini dövlət inhisarına aldı. Abbas 1629-cu ildə vəfat etdi.