İstisu

İstisu Kəlbəcər rayonunda, Tərtər çayının yuxarı axarında, dağlar arasında yerləşir. Adı da elə buradakı isti bulaqlardan gəlir. Rəvayətə görə, bu bulaqların şəfasından hələ qədim Albaniya hökmdarları istifadə edirdilər.

XX əsrdə İstisu Azərbaycanın ən tanınmış müalicə kurortlarından biri idi: bulağın suyu həzm və maddələr mübadiləsi xəstəliklərinin müalicəsində işlənir, "İstisu" mineral suyu isə bütün regionda sevilirdi.

Kəlbəcər 25 noyabr 2020-ci ildə doğma yurda qayıtdı. Bulaqların yanında yeni mineral su zavodu tikildi, "İstisu" yenidən öz mənbəyindən doldurulur. Kurortun müalicə-istirahət mərkəzi də yenidən qurulur.