Macarıstanda dinlər

Macarlar 1000-ci ildə I İştvanın dövründə xristianlığı qəbul ediblər. 2022-ci il siyahıyaalmasına görə əhalinin 29,2%-i katolik, 9,8%-i kalvinist (reformat), 1,8%-i lüteran olduğunu bildirib. Əhalinin 40%-i bu suala cavab verməyib, 16,1%-i isə dindar olmadığını qeyd edib.

Osmanlı dövründə Macarıstanın mərkəzi və cənubunda çoxlu məscid, türbə və təkyə tikilmişdi. Budapeştdəki Gül Baba türbəsi bu gün də müsəlman ziyarətgahıdır. Peçdəki Qazi Qasım paşa məscidi isə sonradan kilsəyə çevrilib.

Bu gün ölkədə kiçik müsəlman, yəhudi və buddist icmaları var. Bəzi macarlar qədim türk inancı olan Tenqriçiliyi də özlərinə yaxın hesab edirlər.