Niğbolu döyüşü (1396)

Kosovadan sonra Osmanlılar Balkanların böyük hissəsini aldılar və Konstantinopolu mühasirəyə saldılar. Macarıstan kralı Sigizmund Avropaya müraciət etdi və Fransa, Burqundiya, Almaniya cəngavərlərindən, Venesiya donanmasının dəstəyi ilə böyük Səlib ordusu toplandı. 1396-cı ilin sentyabrında bu ordu Dunay sahilindəki Niğbolu (Nikopol) qalasını mühasirəyə aldı.

Sultan Bəyazid Konstantinopol mühasirəsini buraxıb sürətlə şimala gəldi. 25 sentyabr 1396-cı ildə fransız cəngavərləri Sigizmundun ehtiyatlı olmaq məsləhətinə baxmayaraq birinci hücuma keçdilər. Onlar Osmanlı qabaq sıralarını yarıb təpəyə qalxdılar, amma orada Bəyazidin əsas qüvvələri ilə qarşılaşıb mühasirəyə düşdülər. Osmanlıların vassalı olan serb knyazı Stefan Lazareviçin süvariləri də döyüşün sonunu həll etdi.

Səlib ordusu darmadağın oldu, Sigizmund qayıqla Dunaydan qaçdı. Burqundiya hersoqunun oğlu Jan Nevers əsir düşdü və böyük fidyə ilə azad edildi. Niğbolu Osmanlıların Balkanlardakı hakimiyyətini möhkəmləndirdi, İkinci Bolqar çarlığının son qalığı olan Vidin də Osmanlılara keçdi.