Azərbaycanlıların Soyqırımı Günü

1918-ci ilin mart–aprel aylarında Bakıda, Şamaxıda, Qubada, Lənkəranda və digər bölgələrdə erməni-bolşevik silahlı dəstələri minlərlə dinc azərbaycanlını qətlə yetirdi, kəndlər yandırıldı, məscidlər və tarixi abidələr dağıdıldı.

Bu faciəyə ilk rəsmi qiyməti hələ 1919–1920-ci illərdə Azərbaycan Xalq Cümhuriyyəti verdi: yaradılan Fövqəladə İstintaq Komissiyası hadisələri araşdırdı və hər il 31 mart matəm günü kimi anıldı. 26 mart 1998-ci ildə Heydər Əliyevin fərmanı ilə 31 Mart Azərbaycanlıların Soyqırımı Günü elan olundu.

Quba Soyqırımı Memorial Kompleksi

2007-ci ildə Qubada tikinti zamanı 1918-ci il qurbanlarının kütləvi məzarlığı aşkar edildi. Burada 2013-cü ildə Quba Soyqırımı Memorial Kompleksi açıldı; muzeydə sənədlər, fotoşəkillər və şahid ifadələri nümayiş olunur. Hər il 31 martda ölkə boyu anım tədbirləri keçirilir.