Ankarada İsmayıl Qaspıralının izi ilə panel: beş türk ölkəsindən natiqlər ortaq dil və yaddaşdan danışdı

Oktyabrın 31-də Ankarada Türk Dünyası Dialoq Forumunun ikinci günündə «Qaspıralının izi ilə: türk dünyasında dil, mədəniyyət və yaddaş» paneli keçirilib. Forum Türkiyə Prezidentliyinin Kommunikasiya İdarəsi tərəfindən TDT-nin 13-cü zirvəsi ilə eyni günlərdə təşkil olunub (30-31 oktyabr). Xəbəri QHA yayıb.

TÜRKSOY-un Baş katibi Sultan Raev giriş çıxışında Qaspıralının fikirlərini təkrarlamağın kifayət etmədiyini, ortaq rəqəmsal resurslar və təhsil proqramları lazım olduğunu deyib. Texnologiyanın mədəniyyəti əvəz edə bilməyəcəyini, irsin təhsil, incəsənət və mədəni istehsalla yaşadılmalı olduğunu vurğulayıb. Paneli İsmayıl Qaspıralı Xarici Siyasət İnstitutunun rəhbəri prof. Esma Özdaşlı idarə edib.

«Şərq» qəzetinin baş redaktoru Akif Aşırlı Qaspıralının azərbaycanlı ziyalılarla əlaqələrindən və «Tərcüman» qəzetinin rolundan danışıb. Qazax şairi və jurnalist Ulugbek Orazbayulı Esdaulet Qaspıralı irsinin konkret hədəflərə çevrilməsini istəyib, «Türküstan ədəbiyyatı» anlayışının genişləndirilməsini təklif edib. Səmərqənd Dövlət Universitetinin filologiya fakültəsinin dekanı prof. Culiboy Eltazarov sovet dövründəki əlifba dəyişikliklərinin və tarixin ideoloji nəzarətinin ortaq yaddaşda yaratdığı qırılmalardan danışıb, ortaq dərsliklər, tələbə mübadiləsi, türkologiya mərkəzləri və rəqəmsal arxiv təklif edib.

Qırğızıstandan prof. Elmira Xuribayeva Manas, Dədə Qorqud və Koroğlu kimi ortaq dastanları, musiqi və sənətkarlıq ənənələrini xatırladıb, gənclər üçün birgə yay proqramları və festivallar təklif edib. Quzey Kiprdən TDT Ağsaqqalı Oktay Öksüzoğlu kipr türklərinin təzyiq altında dilini və kimliyini necə qoruduğunu danışıb.