Ankarada Türk Dövlətləri Təşkilatının Cümhuriyyət Bayramı konsertləri: Dimaş Qudaybergen xüsusi qonaq olacaq

Türkiyənin Mədəniyyət və Turizm naziri Mehmet Nuri Ersoy Türkiyə Cümhuriyyətinin 103-cü ildönümü çərçivəsində Türk Dövlətləri Təşkilatının Cümhuriyyət Bayramı konsertlərinin keçiriləcəyini açıqlayıb. Birinci konsert oktyabrın 28-də saat 20:00-da Ankara Arena İdman Salonunda baş tutacaq.

Konsertdə Prezident Simfonik Orkestri dirijor Cemi'i Can Deliormanın rəhbərliyi ilə çıxış edəcək, qazaxıstanlı müğənni Dimaş Qudaybergen xüsusi qonaq kimi iştirak edəcək. Solistlər arasında soprano Zarina Altınbayeva və Zaira Raimbekova, tenor Umid Şövkət oğlu və Ramil Qasımov var.

Oktyabrın 29-da isə Prezident Kompleksindəki Beştəpə Mədəniyyət və Konqres Mərkəzində Türk Dövlətləri Təşkilatı ölkələrinin dövlət başçılarının şərəfinə xüsusi konsert təşkil olunacaq; Dimaş Qudaybergen həmin axşam öz musiqi qrupu ilə səhnəyə çıxacaq.

Bu xəbərin fonunda Türkiyə Prezidenti Rəcəb Tayyib Ərdoğan oktyabrın 22-də Prezident Kompleksində Türk Dövlətləri Təşkilatının Baş katibi Kubanıçbek Ömüralıyevi qəbul edib.