Pirallahıda Azərbaycan-Türkiyə dərman zavodu açıldı: ildə 60 milyon qutu dərman

Prezident İlham Əliyev oktyabrın 5-də Pirallahı Sənaye Parkında "Gen Pharma Caucasus Manufacturing Operations" şirkətinin dərman zavodunun açılışında iştirak etdi. Müəssisənin təsisçiləri Türkiyənin "Gen İlaç" şirkəti (66%), Azərbaycan Biznesinin İnkişafı Fondu (29%) və Türkiyənin "SİA Pharmaceuticals" şirkətidir (5%).

Layihənin dəyəri 113,9 milyon manatdır. 5,2 hektarlıq zavod ildə 60 milyon qutu dərman, o cümlədən 2,5 milyard tablet və kapsul istehsal edə bilər. Burada ürək, sinir sistemi, şəkərli diabet, mədə-bağırsaq xəstəlikləri üçün dərmanlar, ağrıkəsicilər və antibiotiklər buraxılacaq.

Şirkət 5 il ərzində 500-dən çox preparatın istehsalını ölkəyə gətirməyi və məhsulları Özbəkistan, Qazaxıstan, Gürcüstan və digər ölkələrə ixrac etməyi planlaşdırır. Zavodda Qarabağ Universiteti və Azərbaycan Tibb Universiteti üçün tədris bazası da yaradılıb.

Pirallahı Sənaye Parkı 2016-cı ildə əczaçılıq sənayesini inkişaf etdirmək və dərman idxalından asılılığı azaltmaq üçün yaradılıb. Hazırda Azərbaycanda 8 sənaye parkı fəaliyyət göstərir.