Bakıda İnvestisiya Forumu: "Abşeron" yatağı üzrə yekun qərar verildi

Sentyabrın 26-da Bakıda II Azərbaycan Beynəlxalq İnvestisiya Forumu keçirildi. Forum çərçivəsində imzalanan sənədlərin mübadiləsi mərasimində Prezident İlham Əliyev iştirak etdi.

Ən böyük saziş Xəzərdəki "Abşeron" qaz-kondensat yatağının tam işlənməsi haqqında yekun investisiya qərarıdır. Qərarı SOCAR, Fransanın TotalEnergies və BƏƏ-nin XRG şirkətləri qəbul etdi. SOCAR ilə ExxonMobil arasında isə Orta Kür hövzəsində qeyri-ənənəvi karbohidrogen ehtiyatlarının kəşfiyyatı haqqında hasilatın pay bölgüsü sazişi imzalandı.

Forumda Comstock Resources, Apollo, SEFE, Eni və Oracle ilə də sənədlər imzalandı. Reuters agentliyinin məlumatına görə, sazişlərin ümumi dəyəri 10 milyard dolları keçir.