Səmərqənddə Mərkəzi Asiya dövlətlərinin və ABŞ-ın xarici işlər nazirləri “C5+1” formatında görüşdü

Oktyabrın 19-da Səmərqənddə Mərkəzi Asiya ölkələrinin xarici işlər nazirləri ABŞ dövlət katibi ilə “C5+1” formatında görüşüb. Görüş barədə Türkmənistanın Xarici İşlər Nazirliyi məlumat yayıb.

Müzakirələrdə siyasi dialoq, qonşuluq münasibətləri, terrorizmlə və mütəşəkkil cinayətkarlıqla mübarizə, sərhəd və kibertəhlükəsizlik, eləcə də Trans-Xəzər Beynəlxalq Nəqliyyat Marşrutu daxil nəqliyyat-logistika əlaqələri, ticarət və investisiyalar gündəmdə olub. Rəqəmsallaşma, süni intellekt, enerji və təbii sərvətlərin emalı da nəzərdən keçirilib.

Tərəflər mədəni-tarixi irsin qorunması, təhsil və mədəni mübadilə, turizm və xalqlar arasında əlaqələrin genişləndirilməsini də müzakirə edib. Görüşün sonunda “C5+1” formatının siyasi dialoq və praktik əməkdaşlıq platforması kimi gücləndirilməsində maraqlarını təsdiq edən birgə bəyanat qəbul olunub.