Korkut Ata Türk Dünyası Film Festivalı bitdi: “Kanto” ən yaxşı film, Zaur Qasımlı ən yaxşı rejissor

6-cı Korkut Ata Türk Dünyası Film Festivalı noyabrın 3-7-də İstanbulda keçirildi. TÜRKSOY-un təşkil etdiyi festivalda Türk dünyasından 56 film nümayiş olundu, mükafatlandırma mərasimi Atatürk Mədəniyyət Mərkəzində oldu. Açılışda Çingiz Aytmatov haqqında Kanıbek Kalmatovun “Aytmatov” filminin Türkiyə premyerası göstərildi.

Bədii uzun metrajlı filmlər arasında ən yaxşı film Ensar Altayın “Kanto”su (Türkiyə) seçildi. Zaur Qasımlı “Tağıyev: Məktəb” filminə görə ən yaxşı rejissor, Talaybek Kulmendeyev “Yusuf” üçün ən yaxşı ssenari müəllifi oldu. Ən yaxşı aktrisa Amina Salmanova (“Farzana Goes West”, Başqırdıstan), ən yaxşı aktyor Matyokub Matçonov (“Farz”, Özbəkistan) seçildi. TÜRKSOY-un xüsusi mükafatı Vəfa İşanqulıyevin “Gürgənc gözəli Törebeg” filminə (Türkmənistan) verildi, münsiflərin xüsusi mükafatını Törebek Beysebayevin “38: Son nöqtə” filmi (Qazaxıstan) aldı.

Sənədli filmlərdə birinci yeri Saxa (Yakutiya) respublikasından “Isıyah: Yay gündönümü”, ikinci yeri Özbəkistandan “Həyat susuzluğu”, üçüncü yeri Türkiyədən “Sönməyən od” tutdu. Azərbaycan-Türkiyə ortaq işi olan “Azıx mağarası: Azərbaycanın beşiyi” münsiflərin xüsusi mükafatını qazandı. Qısametrajlılarda “Rehber” (Türkiyə), “Nənə” (Qazaxıstan) və “Günəş uşağı Yusuf” (Özbəkistan) ilk üçlükdə yer aldı.

TÜRKSOY Baş katibi Sultan Raev mərasimdə 2027-ci il Türk dünyası turizm paytaxtının Ankaradan Daşkəndə keçdiyini elan etdi. Festivalın açılışında o, Çingiz Aytmatovun anadan olmasının 100-cü ildönümü olan 2028-ci ilin TÜRKSOY tərəfindən “Çingiz Aytmatov ili” elan ediləcəyini də söylədi.